LTFRB 7 – Sakyanan nga Nadisgrasya sa Carcar, Walay Prankisa

Gitug-an ni Land Transportation Franchising and Regulatory Board (LTFRB)-7 Regional Director Ahmed Cuizon nga walay prankisa ang trak de karga nga nadisgrasya didto sa sitio Mabugnao, barangay Guadalupe, syudad sa Carcar niadtong Huwebes sa udto nga nipatay sa 7 katawo ug 28 ang naangol.

Matud pa ni Cuizon nga ang trak de karga nga gimaneho ug gi-operate ni Mario Panulagan nga may plate number nga GDV 259 walay record sa ilang buhatan nga may frankisa.

Gitug-an usab ni Cuizon nga illegal usab ang paghakot ni Panulagan sa mga kahayopan ug mga tag-iya niini gikan sa Mantalungon, Dalagute paingon sa syudad sa Carcar sanglit dili kini vehicle for hire.

“Number one, wa silay prankisa to operate as a truck for hire. Ikaduha (he is) illegally transporting passengers and this is a truck, it should not operate like a bus or PUJ,” sumala pa ni Cuizon.

Iyang giklaro nga dakong kalapasan ang gihimo sa driver ug operator sa naasoy nga trak de karga sanglit nag-operate kini sama og usa ka kulurom nga sakyanan.

Iyang gitumbok nga P6 mil ang multa nga maoy ipahamtang kang Pamulagan tungod sa maong kalapasan.

Apan iyang gitataw nga ang Land Transportation Office (LTO-7) na ang mopahamtang og silot ug modisiplina sa naasoy nga driver og operator tungod sa kalapasan nga nahimo niini sanglit dili man kini vehicle for hire nga sakyanan.