Local ug Overseas Jobs Fair Ipahigayon Karong Hunyo 12

Aron sa paghatag ug kahigayonan sa mga katawhang Sugbuanon nga nangita ug trabaho, ipahigayon sa kagamhanan ning dakbayan pinaagi sa Department of Manpower Development and Placement kon DMDP ang usa ka Local ug Overseas Jobs Fair karong Hunyo 12, 2016 adlawng Domingo ngadto sa Cebu City Sports Center.

Ang kalihokan gitawag usab ug “Kalayaan Job Fair” gumikan kay itunong kini sa pagsaulog sa Philippine Independence Day anaa na sa ika-limang tuig karon.

Magsugod sa alas-8 sa buntag ug molungtad hangtod sa alas-5 sa hapon ang maong kalihokan nga salmotan sa nagkadaiyang mga ahensiya ug kompanya nga adunay permiso sa Department of Labor and Employment kon DOLE og Philippine Overseas Employment Administration kon POEA.

Giawhag ang tanan nga nangita’g trabaho hilabina ang mga ‘Fresh graduates’ ug mga ‘Unemployed’ sa pagsalmot sa maong higayon nga maghatag ug oportunidad nga makatrabaho. Giawhag usab sila sa pagdala sa ilang updated nga Resume/Biodata, Transcript of Records sa College graduate, High School Diploma, ug Employment Certification kung anaa.

Dugang pa, alang usab sa dugang nga kasayuran mamahimong mobisita sa buhatan sa DMDP nga anaa sa 2nd Floor sa Ramos Multipurpose Building, sa dalan F. Ramos ning syudad o mamahimong motawag sa Telephone Numbers 253–9212 ug 254–4348. (Cebu City Public Information Office PIO/Greggy Jiggs P. Senados)