‘Listahanan’ Mabati na sa Kahanginan

Ang Department of Social Welfare and Development in Central Visayas (DSWD)7 nagmugna og pahinumdom sa radyo o “radio plug” alang sa Listahanan o sa National Household Targeting System for Poverty Reduction (NHTS-PR).

Sumala ni DSWD7 Regional Director Mercedita Jabagat nga ang maong radio plug magsilbi nga kahimanan sa komunikasyon aron makadangat ang kasayoran bisan sa lagyo nga mga lugar a rehiyon.

Ang 50 segundos nga pahinumdom gigamitan og Sinugboanon nga pinolungan aron gayud masabtan ang mga mensahe sa publiko, sumala ni Jabagat.

Midugang si Jabagat pag-ingon nga gisagop sa DSWD ang maong sistema isip mekanismo sa pag-ila sa mga kabus kinsa maoy angay modawat sa mga programa sa kagamhanan ug pribado nga mohatag og proteksyon kanila sama sa Department of Health (DOH), pinaagi sa Philippine Health Insurance Corporation (PhilHEALTH), ug uban pang ahensya sa gobyerno nga may mandato sa paggamit sa Listahanan pinaagi sa gahum sa Executive Order 867.

Sumala ni Jabagat,ang DSWD maoy nag-una ug orihinal nga migamit sa maong “database” o rekord sa pag-ila sa mga benepisyaryo alang sa nagkadaiyang programa nga pamproteksyon ug pangalagad sama sa Pantawid Pamilyang Pilipino Program, Sustainable Livelihood Program, ug ang Social Pension for Indigent Senior Citizens.

Midugang siya nga ang Listahanan or NHTS-PR usa ka sistema sa impormasyon nga moila sa mga pamilya sa matag panimalay nga kabus sa nasud.