LIS: Lig-ong Katabang sa DepEd

Sukad pa sa tuig 2011, ang Department of Education (DepEd) mipahigayon na og Learners’ Information System (LIS),usa ka pasilidad pinaagi sa computer alang sa paglista sa mga kabataang motungha sa mga eskuylahan sa gobyerno.

Karon ang LIS nahimo na nga usa ka kahimanan sa departamento sa pagmugna og kasayoran alang sa paghimo nga sihag ang tanang kalihukan niini .

Sumala ni Secretary Armin A. Luistro, mahinungdanon kaayo nga ang departamento makompleto sa tanang kahimanan sa paghatag og tukmang kasayuran, sa tukmang panahon, ingon man sa pagpakanaug og tukmang desisyon.

Gani sa 46,648 ka tulunghaang pampubliko sa nasud, mikabat lamang og 140 ka eskuylahan ang napakyas sa pagtunol og tukmang record alang sa tuig tingtungha 2014-2015, nga nagpasabot sa kataas sa mihatag og pagtagad sa maong gimbuhaton.

Ang maong sistema gitumong sa paghatag sa departamento sa maayong paagi sa pagpanudlo sa kabataan.

Isip pananglitan, ang mga estudyante nga mobalhin gikan sa usa ka eskuylahan ngadto sa lain, masundan kini pag-ayo pinaagi sa paggamit sa rekord sa LIS.

Ang paggamit sa maong teknolohiya nakatabang kaayo sa DepEd sa pagkuwenta sa enrollment niini ug ingon man sa pagplano. pagbudget ug uban pang gimbuhaton.

Gani nagkanayon si Luistro nga ang mga gimbuhation kaniadto nga molanat og 10 ka buwan una mahuman, mahimo nalang karon nga 3 ka buwan gumikan sa bag-ong sistema nga gisagop niini. Resulta kini sa paggamit sa katawhan ug sa teknolohiya, sumala ni Luistro.