‘Lifestyle’ Check sa Tanang Kawani Gipaboran ni Rama

Mas pabor si Mayor Michael Rama nga ang lifestyle check himuon ngadto sa tanang opisyal ug kawani sa kagamhanan aron mahibaw-an g’yud kon kinsa kanila ang nangilkil gamit ang ilang katungdanan.

Apan adunay pahimangno ang mayor pinaagi sa pag-ingon nga kinahanglan nga ang kagamhanan mag-andam daan og dugang bilanggoan ug ospital kay sigurado man nga dunay magpasakit-sakit aron dili mapriso.

Giluwatan ni Rama ang pamahayag agi og reaksyon sa sugyot nga himoan ang random lifestyle check ang pinili nga opisyal sa kapolisan tungod sa report nga adunay pipila nga nalambigit sa pagpanulis.

Matud ni Rama nga kinahanglan nga ang lifestyle check himuon ngadto gayud sa tanang opisyal ug kawani sa kagamhanan. Apan gilantaw hinuon sa mayor nga mahimong wala nay laing trabaho ang kagamhanan.

Gusto sa mayor nga dili ra kay ang kapolisan maoy himoan og lifestyle check kundili apil ang mga militar, opisyal ug kawani sa lainlaing ahensya sa kagamhanan.

Si Rama miingon nga kinahanglang apilon ang mga “elected” nga mga opisyal sa massive lifestyle check kay bisan siya andam nga magpasusi aron mahibaw-an nga wala gayud siya mangilkil sa kuwarta sa katawhan.

Ang mayor miingon nga pulos na dagko ang iyang mga anak ug pareho na nga mga propesyonal mao nga wala na siya magkinahanglan pa og dugang katigayonan.