Libreng Cervical Cancer Screening sa mga Kababayen-an, Gitanyag sa DOH Karong Buwan sa Mayo

(PIA-7) — Sa tinguhang taposon na ang nagkasakang gidaghanon sa mga namatay tungod sa cervical cancer sa nasud, mopahigayon ang Department of Health (DOH) og libreng cervical cancer screening alang sa mga kababayen-ang may edad 21-pasaka karong tibuok buwan sa Mayo.

Gi-aghat ni Health Secretary Janette Garin ang mga kababayen-an sa pag-adto sa pinakaduol nga health center ug pahimoslan ang libreng serbisyo.

Matud pa sa Kalihim, adunay 65 ka government ug private hospitals sa tibuok nasud ang maghatag sa libreng cervical cancer screening sa mga kababayen-an dungan sa pag-obserbar sa Cervical Cancer Awareness Month ning buwan sa Mayo.

Ang maong screening parte sa programang “Babae, Mahalaga Ka”, usa ka public-private partnership sa pagtinabangay sa Philippine Obstetrical and Gynecological Society ug pharmaceutical firm nga Merck Sharp and Dohme, katambayayong ang Society of Gynecologic Oncologists of the Philippines ug Philippine Society for Cervical Pathology and Colposcopy.

Base sa taho sa 2010 Philippine Cancer Facts and Estimates, mitumaw nga ang cervical cancer ang ikaduhang kinadak-ang cancer killer sa mga Pinay, nagsunod sa breast cancer.

Adunay 6,000 ka kababayen-an ang na-diagnosed nga nataptan sa maong sakit matag tuig ug 12 kanila ang mamatay matag-tuig.

Taliwala niini, gitataw ni Garin nga mahimong masumpo ug matambalan ang cervical cancer kun sayo kining matumbok pinaagi sa screening. (mbcn/ecb/PIA7-Bohol)