Liboan Kapamilya Nawad-an sa Panimalay

Kapin sa usa ka libo ka pamilya ang nawad-an sa ilang panimalay kagahapon dihang giugdaw kini sa daw imperno nga sunog nga miulbo sa unom ka sitio sa Barangay Lorega-San Miguel.

Ang sunog miugdaw sa kapin sa 500 ka balay nga nahimutang sa Sitio Kamansi, Sitio Lawis, Sitio Laguna, Sitio Seares, Sitio San Roque ug Sitio Itum-Yuta.

Gihulagway nga ang sunog nga miulbo sa Lorega-San Miguel kagahapon sa hapon maoy labing daku nga miulbo dinhi sa dakbayan sa Sugbo atol niining pagsaulog sa Fire Prevention Month.

Si Fire Investigator Danilo Relatado mibutyag nga gideklarar nila nga “general alarm” ang sunog kay nakita nila nga paspas kaayo ang pagsilaob sa kayo.

Si Mayor Michael Rama dali nga miadto sa dapit nga nasunogan og nakapanglingo-lingo nga nagtan-aw sa kayo nga “hangol” kaayo nga miugdaw sa kabalayan.

Ang kabomberohan naglisud pagpawong sa sunog tungod kay mahutdan dayon sila sa tubig og layo ang fire hydrant nga kakuhaan nila og tubig.

Usa ka molupyo sa Sitio Lawis nga si Elvis Nella mitug-an nga gikan sa Sitio Kamansi nagsugod ang sunog apan wala siya makatug-an kun kang kinsa nga balay ang gigikanan sa kayo.

Ang Sitio Kamansi nahimutang sa karaang Menteryo Munisipal ug dili layo sa daang ihawan sa Lorega-San Miguel. Ang kayo paspas nga mitabok sa Sitio Lawis, dayon ngadto sa kanait pa nga mga sitio.

Ang Sitio Itum-Yuta giuwang sa dalan Lorega gikan sa Sitio Kamansi apan ang kayo mitabok tungod sa grabe’ng kainit nga wala na mabangbang pagpawong sa mga bombero.

Mga reporters nga nag-cover sa sunog sa Lorega mihulagway sa mga bombero nga “atras-abante” sa ilang pagkumbati sa kayo tungod kay dili nila masungasong ang grabe nga kainit.

Usa ka 10-anyos nga bata nga si Jaira Gutual taga Sitio San Roque ang giingong “missing” kagabii apan ang iyang duha ka manghod nakit-an ra.

Ang karaang ihawan nga gihimo na nga sports center nakan-an og kabahin sa kayo apil ang kapilya sa San Roque nga nahimutang kilid ra sa barangay hall.

Ang mga miresponde nga trak sa bombero naglisud pagpahimutang aron makapasirit unta og tubig kay ang karsada nga nahimutang kilid sa karaang ihawan gipangtukoran og kabalayan.

Bisan og si Mayor Rama mimando sa mga kawani sa Department of Social Welfare and Services (DSWS) sa paghatag og pagkaon sa mga nasunogan, apan tungod sa kadaghan sa mga biktima sa sunog wala dayon kini mahimo kagabii.

Ang konseho sa dakbayan sa Sugbo gipaabot nga modeklarar karong buntag Miyerkules og State of Calamity sa Barangay Lorega atol sa ilang sesyon aron ang City Hall makagasto sa iyang calamity budget pagtabang sa mga biktima sa sunog.

Ang kabomberohan wala pa makabutyag kun unsay hinungdan sa pag-ulbo sa sunog.

Image Credit: www.veooz.com