Opinions
Libelo
Gikan pa sa 1930, balaod kini nga gisaway,
binag-ong libelo, 15 ka petisyon ang gipanglaray,
daghang mga panaway ug pagbabag gipanday,
gikahadlokan sa manaway, gikalipay sa gisaway,
Tigsulat sa pakaulaw mitiyabaw,
pagpakaulaw kini nga gimantala,
sa halapad nga kahanginan gisibya,
nagkalainlaing ‘social networks’ gigama,
Kini motataw sa kamasalaypon
kasalawayon sa gitutukang pamayhon,
binuhatan, hulagway, bansagon,
dungog, kining tanan tutyuon,
Tigpakaulaw kuno dili mapugngan,
magpasalipod sa pulong kagawasan,
apan ang kagawasan may kinutuban,
kon katungod sa uban imong tamakan,
Dili ang maayong tinguha ug katuyuan
sa tigpakaulaw ang paminawon ug pabug-atan,
ang panabot sa mensaheng gipaambitang
moturok sa panghunahuna sa uban,
Sa ‘Facebook’, ‘Twitter’, pakaulaw mamilit,
ang mouyon ug mopaambit dili man mapiit,
kanunay’ng han-ayon lang ang panultihon,
dili masayon kon sa saway ikaw gisahon,
Apan mas dili sayon, kon imong pagkahinawayon,
mohinog ug kabasolanan sa tukmang panahon,
bagolbol, reklamo sa mapintas kuno nga balaod,
pilit kining dawaton, aron dili kita mahisukamod…
