Level One Pusher Sikop sa Inayawan Buy Bust

Usa ka lalaki nga giingong level one drug pusher nasikop sa City Intelligence Branch(CIB) sa buy bust operation sa barangay Inayawan lakip na sa laing walo ka tawo kinsa nasakmitan usab og kapin sa tunga sa milyon ka pesos nga balor sa gidiling drugas sa miaging hapon.

Ang nasikop naila nga si Henry Monterde, taga Sambag I, Cebu City nga maoy tumong sa buybust operation.

Lakip nga nasikop mao sila si Epe Torrejas, 24, taga Barangay Inayawan, nga usa ka stock clerk , Efren Satore, 36, taga Sibonga, Cebu. Vincent Blarusan, 21, Andrey Insila, 19, Ramil Delbo, Nelson Cantutay, 48, taga Barangay Inayawan, Felix Tabal, 22, taga Bulacao ug Mike Delicano, 18, nga taga Pardo.

Si Supt. Romeo Santander, hepe sa CIB, miingon nga sukad pa niadtong Sabado nila gimonitor si Monterde ug human nila maverify ang maong taho ila dayong gipahigayon ang buy bust.

Pasado alas 5:00 niadtong Biyernes sa hapon gipahigayon ang maong buy bust nga miresulta sa pagkasikop sa siyam.

Nahipos sa kapolisan ang 24 ka bundle mga dahon sa marijuana nga motimbang labaw sa usa ka kilo matag bundle; 15, 000 ka linikit nga marijuana; usa ka medium pack sa gituohang shabu; drug paraphernalia ug usa ka kalibre nga .38 revolver nga may upat ka bala.

Matud pa ni Santander nga kun mahalin na ang maong mga drugas mokabat kini og P510, 000.

Dugang pa ni Santander nga naglisod sila sa pagsulod sa maong drug den tungod kay hagip-ot kaayo ang dalan niini og aduna pay cctv camera ang maong balay.

Sumala pa ni Santander nga level one drug puhser si Monterde apan sinaligan lang kini sa usa ka drug personality nga anaa sa listahan sa CIB.

Si Monterde nga nahinabi sa mga tigbalita miingon nga igo lang siyang miagi sa maong dapit ug wala siyay labot apan gitawag siya sa polis ug gipasaka sa balay.

Matud pa ni Monterde nga dihang misaka na siya didto na giplastar sa mga polis ang mga ebidensya.

Dugang pa niya nga di niya mabuhat ang pasangil sa polis batok kaniya sanglit usa man siya ka clerk sa Kadre Security Agency nga gipang-iya sa iyang uyoan nga si kanhi kongresista Jun Alcover.

Si Monterde mag-atubang og kasong kalapasan sa Comprehensive Dangerous Drugs Act of 2002 lakip na sa walo ka mga nasikop.

Gawas niini si Monterde mag-atubang usab og kasong kalapasan sa Comprehensive Law on Weapons and Ammunitions.