Laing Kawani sa Brgy. Mogamit og Shabu

Lain na usab nga lima ka kawani sa barangay dinhi sa dakbayan sa Sugbo ang namatud-an nga tiggamitan og shabu.

Ang lima mga kawani sa Barangay Punta Princesa nga namatud-an nga mga tiggamitan og shabu ug hayan taktakon sa ilang katungdanan.

Wala hinoon itug-an ni Kapitan Jose Navarro ang ngalan sa mga adik nga pulos ordinaryo lang nga mga kawani sa barangay.

Matud ni Navarro nga magtigum sila’ng mga sakop sa Barangay Council og sabotan unsa’y ilang himoon niini’ng mga kawani nga adik sa illegal nga drugas.

Si Navarro maoy miawhag sa COSAP nga gipangulohan ni Dr. Alice Utlang nga himoan og drugtest ang iyang mga kawani, apil ang tanang konsehal.

Matud ni Utlang nga moabot na og dul-an sa 50 ka kawani sa barangay nga nahimoan nila og drugtest ang namatud-an nga sila tiggamitan og shabu.

Kaniadtong Biyernes miaging semana, duha ka kawani sa Barangay Lahug napositibo usab sa paggamit og ilegal nga drugas.

Sagad sa mga mogamit og shabu mao ang mga basurero sa barangay kay matud ni Dr. Utlang gituyo kini sa mga kawani aron dili nila mapanimahoan ang kabaho sa basura.