Laing Kawani sa Brgy.,Mogamit og Shabu

Pito g’yud ka kawani sa Barangay Sambag-1 ang namatud-an nga adik diay sa shabu kay napositibo sila sa kinalit nga drugtest nga gihimo kagahapon,adlawng Martes.

Matud ni Dr. Alice Utlang, hepe sa Cebu City Office for Substance Abuse Prevention (COSAP), nga tulo ka tanod ug upat ka garbage collectors ang namatud-an nga mga adik.

Kapin sa 80 ka kawani sa barangay, apil ang mga opisyal nga gipangulohan ni Kapitan Lemar Alcover, ang gihimoan og surprise drugtest.

Si Kapitan Alcover miingon nga nalipay siya nga nasayran na kun kinsa sa iyang mga kawani sa barangay ang tiggamitan og gidili nga matang sa drugas.

Matud hinoon ni Alcover nga dili dayon niya taktakon sa katungdanan ang mao nga mga kawani kay hatagan pa niya sila og laing higayon nga magbag-o.

Ang buhaton ni Alcover mao ang pagpatawag sa pito ka kawani nga napositibo sa illegal nga drugas ug pangutan-on ngano nga misulod sila sa mao nga bisyo.

Si Dr. Utlang miingon nga iyang nahibaw-an nga ang uban nga garbage collectors mitug-an nga mapugos sila sa paggamit og shabu aron dili nila mapanimahoan ang kabaho sa mga basura.

Adunay uban nga nangatarongan nga migamit sila’g shabu aron dili sila magduka samtang mohakut sa mga basura panahon sa gabii o kaadlawon.

Matud ni Utlang nga human nila og drugtest sa tanang mga barangay mohimo, sila og sugyot ngadto ni Mayor Michael Rama kun unsaon pagsulbad ang problema.

Kun tinuod nga ang paggamit nila og shabu tungod sa kabaho sa basura kinahanglan sila nga palitan og mga tabon sa ilang ilong aron dili nila masingo ang baho.

Si Utlang miingon nga kun ang pagwagtang sa duka ang rason, angay nga kadtong motrabaho sa gabii dili patrabahoon sa adlaw.