Laing Kawani sa Barangay, Positibo

Tulo ka kawani sa Barangay Santo Niño, nga naglakip sa usa ka sakop sa Lupong Tagapamayapa, namatud-an nga adik sa paggamit og gidili nga matang sa drugas.

Si Dr. Alice Utlang, hepe sa City Office for Substance-Abused Prevention (COSAP), miingon nga una’ng higayon kini nga adunay sakop sa Lupon nga napositibo sa drugtest dinhi sa dakbayan.

Bisan si Ernest Herrera III, executive director sa COSAP, miingon nga nasubo kaayo siya pagkasayod nga gawas sa duha ka garbage loaders nga unang napositibo sa drugtest, naapil pa ang sakop sa Lupon.

Ang Lupon maoy gitahasan sa paghusay sa mga pqanagbangi sa mga lumolupyo sa ilang barangay ug matud ni Herrera angayan g’yud unta sila nga magsilble nga ehemplo sa ilang katagi-lumolupyo.

Matud ni Herrera nga kon siya ang pagbut-on angay gayud nga taktakon dayon sa serbisyo ang mga sakop sa Lupon ug ubang opisyal nga mapositibo sa gidili nga matang sa drugas.

Miabot na og 181 sa 4,348 ka kawani sa barangay nga napositibo sa kinalit nga drugtest nga gihimo sa COSAP sa kapin sa 50 na ka barangay sukad sa sayo nga bahin niini’ng tuiga.

Daghan hinuon sa mga namatud-an nga adik nga kawani sa barangay wala lang gitaktak sa ilang serbisyo, ilabi na kadto’ng mga ilado kaayo nga alyado sa barangay kapitan.

Si Dr. Utlang miingon nga gusto g’yud unta nila nga karong buwana mahuman na ang pag-drugtest sa mga kawani sa barangay apan wala sila magmalampuson sa ilang tinguha.

Human sa pag-drugtest sa mga kawani sa barangay isunod na usab ang paghimo og random drugtest sa mga tinun-an sa lainlaing public schools.