Laing Kawani Positibo sa Gidiling Drugas

Usa ra ka kawani sa Barangay Kinasang-an, dakbayan sa Sugbo ang namatud-an nga tiggamitan og gidili nga matang sa drugas diha nga napositibo kini sa kinalit nga drug test Byernis kagahapon.

Si Doktora Alice Utlang nga maoy hepe sa City Office for Substance-Abuse Prevention (COSAP) miingon nga usa ka yano lang kawani sa Barangay Kinasang-an ang namatud-an nga drug user.

Si Kapitan Jeffrey Navarro maoy miawhag sa COSAP nga himoan og kinalit nga drugtest ang iyang mga opisyal ug kawani, apan kadto’ng mga tiguwang na g’yud nga sakop sa Lupong Tagapamayapa wala na lang ipaapil. Matud ni Utlang nga maklaro usab kaayo sa panglawas sa mao nga mga tiguwang nga kawani nga dili sila mogamit og illegal nga drugas.

Si Utlang miingon nga depende na sa kapitan kun unsay himuon nila sa mao nga drug user.

Dinhi sa dakbayan sa Sugbo, dul-an na sa 110 ka kawani sa barangay ang napositibo sa kinalit nga drug test apan dili tanan kanila ang gitaktak sa serbisyo kay ang uban gihatagan og higayon nga magbag-o.

Sa kapin sa 30 ka barangay nga ang mga opisyal ug kawani gikalitan og drugtest, walo ra ang gideklarar nga drug free kay walay bisan usa ang napositibo sa illegal nga drugas, ang kadaghanan sa mga barangay duna g’yuy napositibo.