Laing Bata Giplasteran

Gitug-an sa Department of Health (DOH)-7 nga ang ilang buhatan andam nga moimbestigar batok gihapon sa Cebu Puericulture Center and Maternity House tungod sa pagtumaw sa laing bata nga giplasteran gihapon ang baba human sa pagkahimugso niini sa naasoy nga hospital.

Matud pa ni DOH-7 Regional Director Jaime Bernadas sa pagpakighinabi sa mga sakop sa media nga bukas kaayo ang ilang buhatan lakip na ang Inter-Agency Fact Finding Investigating Committee sa paghimo og corroborative investigation sa nahitabo sa anak ni Jessel Laica Artua, 22, kinsa gipakita sa video footage nga gitaoran og pacifier ang baba sa bata niadtong Pebrero 24 ning tuiga.

Matud pa ni Bernadas nga ilang paabuton nga mopadangat og reklamo o affidavit ang pamilyang Artua batok sa Maternity hospital uban ang pagpakita sa nakuha niining recorded video sa kahimtang sa bata nga may pacifier ang baba sa sulod sa Maternity hospital.

Samtang si Primo Cadampug sa Commission on Human Rights (CHR)-7 mitug-an nga sa higayon nga dili mudangop sa DOH-7 ang banay nga Artua, ang ilang buhatan maoy mangita niini ug mokonbinser sa pagluwat og reklamo batok sa hospital.

Kini aron mahiusa ang ipagawas unya nga desisyon sa Inter Agency Fact Finding Investigation batok sa Maternity Hospital tungod sa pagbutang og pacifier sa batang lalaki ni Ryan Noval.

Samtang mitug-an ang abogado sa Maternity Hospital nga si Atty. Carmelo Mercado nga posibling pasyente sa naasoy nga hospital ang ikaduhang bata nga nakuhaan og video nga may pacifier ang baba apan iyang gitataw nga ila pa nga gisusi kun tinuoray ba nga gigamitan og pacifier ang bata.

Susihon usab sa naasoy nga hospital kun si kinsa ang doctor nga miatiman sa bata ug ang mga nurse niini aron matumbok kun giplasteran ba gyud ang baba sa bata ug may igo bang medical nga hinungan sa pagbutang niini ngadto sa bata.

Samtang gitataw usab niya nga andam nga mohatag ang naasoy nga hospital sa tanang gipangayo nga dokumento ug record sa DOH-7 pagmatuod nga dili tinuod ang alegasyon sa banay nga Noval nga giplasteran sa nurse ang baba sa anak niini nga bag-o pa lamang nahimugso tungod sa giingong kakusog sa paghilak niini.