Laing Access Road sa Gorordo, Planong Ablihan

Si Mayor Michael Rama nakigtagbo na ni Gobernador Hilario Davide III aron masugdan ang paghisgot sa pagbukas og laing access road nga modugtong sa Gorordo Avenue gikan sa Barangay Kalunasan.

Ang karsada nga gusto nga ipahimo ni Mayor Rama buwag ni sa hagip-ot nga karsada nga anaa mag-agi duol sa main entrance sa Beverly Hills nga mosangko gihapon sa Barangay Kalunasan, apan iyang gihulagway nga likoon na kayo.

Gusto ni Rama nga ang pagamugnaon nga karsada anha kini molagbas sa yuta nga gipanag-iya sa Probinsya sa Sugbo kilid nga bahin sa karaang headquarters sa Cebu Provincial Police Office (CPPO) sa dalan Dona Modesta Gaisano.

Bisan og wala dayon uyoni ni Davide ang sugyot ni Rama, ang mayor malaumon nga nasabtan sa gobernador ang iyang maayo nga tumong.

Pagka karon, ang mga sakyanan nga manglaktud pag-agi sa Kalunasan kon paingon sila sa Lahug, makasinati gihapon og problema sa trapiko kay gamay man kaayo ang karsada.

Matud sa mayor nga aduna pa’y laing panagtagbo nila ni Davide alang sa katumanan sa gipangandoy niya nga pagmugna og dugang access road.