Laing 50 ka Driver, Dakpunon

Laing 50 ka drayber og mga passenger jeepneys dinhi sa Sugbo ang nalutsan og warrant of arrest tungod sa nagtipun-og nila nga mga kaso nga gipasaka batok kanila sa hukmanan.

Mao kini ang gibutyag ni Jonathan “Joy” Tumulak, ang operations chief sa City Traffic Operations Management (CITOM), nga mipahibalo sa pagkadawat nila sa daghang warrant gikan sa korte.

Giawhag ni Tumulak kadtong mga drayber nga nadakpan sa makadaghan nga higayon, nga moadto sila sa Traffic Violations Bureau (TVB) og bayran ang ilang multahan.

Wala na ibutyag pa ni Tumulak ang ngalan sa mao nga mga drayber tungod sa kadaghan. Sagad kanila nagbalik-balik lang nga nadakpan sa mga traffic enforcers.

Matud ni Tumulak nga adunay uban sa mga drayber sa PUJ nga ang multahan miabot og P172,000 nga nagpasabot nga nadakpan kini subra sa 150 ka higayon ug ang uban nadakpan kapin sa 100 ka higayon.

Ang CITOM naghulma na karon og team aron nga pangitaon kini nga mga drayber nga giisyuhan og warrant of arrest ni Judge Monalila Tecson sa Municipal Trial Court in Cities (MTCC).

Kon ang maong mga PUJ drivers madakpan, itugyan sila ngadto sa huwes nga nagmando sa pagpadakup kanila.