Labella: Sundon Ang Rules of Engagement

Si Cebu City Vice Mayor Edgardo Labella miawhag sa kapolisan nga sundon g’yud ang Rules of Engagement kun mogamit sila sa ilang armas aron malikayan nga mahisama sa gidangatan ni SPO1 Adonis Dumpit.

Ang pamahayag ni Labella giluwatan human nga ang polis nga kanhi bodyguard ni kanhi mayor Tomas Osmeña gikonbikto sa
kaso nga homicide tungod sa pagpatay ni Ronron Go kaniadto’ng 2004.

Ang rules of engagement naglatid nga ang armas nga gi-isyu sa mga polis gamiton lang pagpanalipod sa ilang kaugalingon kun ang kinabuhi sa mga polis mag-atubang na og kakuyaw sa pagpatuman sa balaod.

Si Ronron Go gikataho nga naigo sa iyang buko-buko dihang gipusil ni Dumpit tungod kay giingon nga nakigpinusilay kini kaniya atol sa pagresponde niya sa kaso nga pagpanulis didto sa Barangay Tejero.

Hinuon, ang pangangkon ni Dumpit nga self-defense ang pagpatay niya sa 17-anyos nga si Ronron Go wala tuohi sa hukmanan kay walay ebidensya nga nagsuporta sa iyang pangangkon.