Labella Dismayado sa Sapot sa Citom Enforcer

Wala malipay si Cebu City Vice Mayor Edgardo Labella kay sa makadaghan nga higayon nakakita siya og mga traffic enforcers nga hugaw kaayo ang sapot nga gisul-ob ug ang uban wala magsul-ob og mga reflectorized vest.

Matud ni Labella nga gipadad-an niya’g suwat si Atty. Rafael Christopher Yap, executive officer sa City Traffic Operations Management (CITOM), nga aksyonan dayon kini’ng iyang nabantayan.

Gusto sa bise mayor nga presentable ang mga traffic enforcers nga magdumala sa trapiko ug aron malikayan nga sila madam-agan og sakyanan panahon sa gabii kinahanglang isul-ob nila ang reflectorized vest nga gipalit sa dakbayan.

Usa ka babaye nga traffic enforcer namatay diha nga nadam-agan kini og sakyanan nga gimaneho og Korean national samtang nagdumala sa trapiko sa Barangay Banilad sa miaging tuig.

Si Labella miingon nga diha’y higayon nga nakakita siya og mga traffic enforcers nga wala magsul-ob og reflectorized vest atol sa pag-duty nila panahon sa gabii.

Giangkon ni Labella nga wala gayud siya malipay pagkakita sa traffic enforcer nga hugaw kaayo ang karsones nga gisul-ob ingon man ang iyang upper uniform.

Dinhi sa dakbayan sa Sugbo, adunay dul-an sa 300 ka traffic enforcers nga sakop sa City Traffic Operations Management (CITOM).