Kuryente sa Sugbo, Gikabalak-ang Magnihit

Ang dakbayan sa Sugbo ug ubang bahin sa Kabisay-an wala na makatagamtam og “brown-out” sukad kaniadtong Disiyembre 21 tungod diay sa sobra nga suplay sa kuryente nga nakuha gikan sa Luzon.

Apan gikabalak-an nga kun mokusog ang panginahanglan sa kuryente karong buwan sa Marso ug Abril gikabalak-an nga makasinati na usab og problema ang Sugbo sa kanihit og kuryente.

Ang kadagkoan sa Department of Energy (DOE), National Grid Corporation of the Philippines (NGCP), Energy Regulatory Commission (ERC) ug Visayan Electric Company (VECO) gipatambong sa sesyon sa Cebu City Council.

Si Neil Medina sa operations division sa NGCP miingon nga 200 megawatts nga kuryente gikan sa Luzon ang nadugang sa panginahanglan nga kuryente dinhi sa Kabisay-an, apil ang Sugbo.

Nagpasabot nga kun wala pa ang subra nga kuryente gikan sa Luzon ang Sugbo ug ubang bahin sa Kabisay-an nakasinati na og subsob nga brown-out.

Ang NGCP maoy modala sa kuryente gikan sa lainlaing dapit sa nasud pinaagi sa gitawag og interconnection” aron kapahimuslan kini sa ubang mga lugar nga magkuwang og kuryente.

Pagka karon wala pa hingpit nga naayo ang nangaguba nga planta sa Geothermal Power Plant sa Tongonon, Leyte nga naapektahan sa bagyo nga Yolanda.

Matud sa NGCP nga kun hingpit na nga mabalik sa operasyon ang tanang Geothermal Plants masulbad na gayud ang problema sa kakuwang og kuryente.

Si DOE-7 regional direktor Antonio Labios miawhag g’yud sa katawhan nga magdaginot paggamit og kuryente aron malikayan ang problema.

Matud ni Labios nga pabor kaayo siya nga adunay mga magpapatigayon nga mopalambo sa “renewable energy” pinaagi sa paggamit og solar power nga gikan sa init sa adlaw.

Ang paggamit og solar power usa ka maayo nga paagi kay wala na’y bayranan ang katawhan sa kuryente nga ilang magamit apan magkinahanglan kini og puhonan nga ikapalit og solar panel nga maoy mohipos kuryente
gikan sa adlaw.