Konseho: Paspasan Ang Pag Aspalto sa Dalan

Ang mga konsehal sa dakbayan sa Sugbo miawhag na sa mga opisyal sa Department of Public Works and Highways (DPWH) nga papaspasan sa ilang kontraktor ang pagpang-aspalto sa mga karsada.

Nakabantay ang mga sakop sa Cebu City Council nga paspas kaayo ang mga kontraktor nga gikuha sa DPWH sa pagkaskas sa karsada apan dugay kaayo nga moaspalto niini pagbalik.

Ang City Traffic Operations Management (CITOM) Board nadismaya usab pag-ayo sa kalangan sa pag-aspalto nga nakaapekto sa dagan sa mga sakyanan tungod kay gipangbiyaan sa mga kontraktor ang mga gikaskas nila nga karsada.

Duha ka tawo nga nagsakay og motorsiklo maayo nga pagkabagnos diha nga nadakin-as ang ligid sa ilang gisakyan sa Gorordo Avenue ubos nga bahin sa Barangay Hall sa Lahug.

Ang mao nga dapit gikaskas sa Ven Ray Construction apan wala dayon aspaltoha sulod na sa upat ka adlaw. Ang pag-aspalto sa tibuok Gorordo Avenue gikontrata og P6.9 milyones.

Mireklamo ang mga opisyal sa kabarangayan kay wala mo-coordinate kanila ang DPWH contractors sa pagsugod sa ilang proyekto.

Sa sesyon kagahapon, si Marilyn Ojeda nga maoy planning and design division chief sa DPWH nangangkon nga ang ilang mga project engineers mi-coordinate gyud sa mga opisyal sa barangay.

Apan si ABC president Philip Zafra miingon nga wala gayud makigtambayayong kanila ang mga kontraktor sa DPWH nga nagpahigayon og asphalting project.