Konseho Mibalibad sa “Consultants” ni Rama

Wala aprobahi sa Cebu City Council ang gitinguha ni Mayor Michael Rama nga sila si kanhi konsehal Procopio Fernandez ug Edwin Jagmoc iyang kuhaon nga mga consultants.

Si Konsehal Lea Ouano-Japson maoy misugyot og resolusyon nga magtugot unta sa mayor nga makigpirmahay og work contract ngadto nila ni Jagmoc ug Fernandez.

Ang termino sa pag-hire kanila ni Fernandez ug Jagmoc mao ang Enero 1 ngadto sa Hunyo 30 karong tuiga. Kun aprobahan ang pagkuha nila nga consultants, ang ilang sweldo P18 mil ang buwan.

Si Konsehal Sisinio Andales nga maoy tsirman sa Committee on Laws mipadayag nga hayan supak sa balaod ang pagkuha nila ni Fernandez ug Jagmoc nga consultants kay wala pa molapas ang usa ka tuig human sa eleksyon nga sila napilde pagka konsehal.

Sila si Jagmoc ug Fernandez pareho nga milansar pagka konsehal ubos sa Team Rama, apan napilde.

Ang mga konsehal mitugyan niini nga isyu ngadto sa Civil Service Commission (CSC) aron mangayo sila og katin-awan kun dili ba makalapas ang dakbayan sa balaod kun kuhaong consultant ang duha.

Si Mayor Rama miingon nga kun supak man sa balaod ang pagpatrabaho nila ni Jagmoc ug Fernandez nga wala pa’y usa ka tuig gikan sa eleksyon niadtong Mayo sa miaging tuig, walay problema alang kaniya kay hapit na man usab ang Mayo.