Konseho Malaumon: NHA Motabang sa mga Biktima sa Sunog

Ang Cebu City Council miawhag sa National Housing Authority (NHA) nga tabangan ang kapin sa usa ka libo ka pamilya nga nasunogan sa ilang kabalayan sa Barangay Lorega-San Miguel.

Matud ni Konsehal Alvin Dizon nga kaniadto, ang NHA mihatag og P5,000 nga hinabang sa mata’g pamilya nga nasunogan ug lauman nila sa konseho nga ila gihapon kini nga himoon karon.

State of Calamity

Samtang ang dakbayan sa Sugbo makagamit na karon sa iyang Calamity Budget aron gastohon pagtabang sa kapin sa 7,000 ka biktima sa sunog sa Barangay Lorega-San Miguel. Kini pinasikad sa pagdeklarar sa Cebu City Council nga ang Barangay Lorega-San Miguel ubos na sa State of Calamity, human aprobahi ang resolusyon nila ni Konsehal Dave Tumulak ug Gerardo Carillo.

Kun madeklarar na nga ang usa ka dapit nga State of Calamity ang kagamhanan makahimo na paggasto sa iyang Calamity Budget nga dili na kuti ang pagkuha og mga dukomento.

Ang dakbayan sa Sugbo migahin og kapin sa P200 milyones nga Calamity Budget karong tuiga ug ang 30 porsiento niini gamiton sa pagtabang sa mga biktima sa katalagman ug ang 70 porsiento alang sa calamity preparedness.

Reblocking

Giawhag ni Tumulak ang dinalian nga re-blocking sa nasunogang bahin sa Barangay Lorega-San Miguel aron maklaro ang karsada nga maagian sa mga bombero kun adunay sunog.

Nakabantay si Tumulak nga adunay mga karsada sa Lorega-San Miguel, usa niini ang nahimutang kilid sa karaang ihawan, nga gitukoran na og mga balay mao nga ang mga bombero wala na makasulod aron unta sayon ra ang pagpawong sa kayo.

Miawhag si Tumulak sa mga sakop sa Cebu Contractors’ Association nga motabang sa pagpahigayon og reblocking.

Image Credit: www.veooz.com