Konsehal sa Brgy. Gi-Isyuhan og Citation Ticket sa CESET

Konsehal sa Barangay Guadalupe nga maoy nagdumala sa Committee on Environment gi-isyohan og citation ticket kay matud pa wala kini mohimo’g lakang pagbadlong sa mga molupyo nga dili magpataka og labay sa ilang mga basura.

Si Grace Luardo nga maoy hepe sa City Environmental Sanitation Enforcement Team (CESET) miingon nga kinahanglan nga i-settle ni Konsehal David Suzara ang iyang Citation Ticket aron dili siya mapasakaan og kaso sa hukmanan.

Matud ni Luardo nga sukad kaniadtong Sabado sa hapon nagsugod na sila og rekorida sa Guadalupe, ilabi na sa daplin sa V. Rama Avenue nga dili magpataka og labay sa basura nga wala pa ang garbage truck agi og pagpangandam sa Palm Walk nga gipasiugdahan ni Mayor Michael Rama.

Si Mayor Rama milakaw uban sa iyang mga dumadapig gikan sa eskena Natalio Bacalso Avenue subay sa V. Rama Avenue paingon na sa simbahan sa Guadalupe aron motambong sa misa pahinungod sa pagsaulog sa bendita sa lukay.

Si Luardo miingon nga daghan g’yud nga mga tawo ang nagpataka lang og labay sa ilang mga sagbot daplin sa karsada bisan og miabot na lang sa tunga’ng gabii nga nagsigi ang CESET og pahibalo nga dili molabay og basura daplin sa karsada.

Dunay usa ka tawo nga gigukod sa mga sakop sa CESET kay misibat kini dayon human ilabay ang mga basura daplin sa karsada nga gilimpyohan na unta sa mga sakop ni Luardo.

Daghang mga tagdumala og balay-patigayon ang gipang-isyuhan ni Luardo og citation ticket kay ang ilang basura diha ra gibutang palibot sa ilang tindahan.

Ang City Ordinance 1361 naglatid nga ang tagbalay ug ang tagdumala sa mga tindahan maoy adunay katungod sa paglimpyo sa dapit lima ka metros gikan sa ilang balay o tindahan.

Matud ni Luardo nga ang uban sa ilang mga nasakpan miingon nga wala gayud sila pahibaw-a sa ilang mga opisyal sa barangay kun anus-a ang tukma nga oras nga angay’ng ilabay ang mga basura.

Kini maoy rason nga si Luardo mihukom nga si Konsehal Suzara isyuhan og citation ticket kay wala siya makatuman sa iyang katungdanan.

Gihulagway nga ang CESET aktibo karon nga nangisyu og citation ticket bisan gani sa mga manigarilyo sulod sa mga sakyanan sa kagamhanan. Usa nga naisyuhan sa CESET mao si konsehal Dave Tumulak.

Si Mayor Michael Rama miingon nga gisuportahan niya ang hugot nga kampanya nga gihimo ni Luardo.