Konsehal Pasabton ang COA

Si Konsehal Dave Tumulak misaway sa Commission on Audit (COA) tungod sa pagpagawas og report nga ang dakbayan sa Sugbo nakalapas sa balaud tungod sa pagsweldo og mga job order employees nga gikuha gikan sa Calamity Fund.

Si Delia Monte de Ramos, ang COA cluster director for Local Government Units, miingon nga ang gihimo sa dakbayan sa Sugbo usa ka kalapasan sa lagda sa Republic Act 10121, ang Disaster-Risk Management Law.

Ang mga government auditors miingon nga ang calamity budget gastohon lang g’yud unta sa mga proyekto nga magpugong sa katalagman og kon may nahitabo na nga kalamidad, gamiton usab kini sa pagtabang sa mga biktima.

Apan matud ni Tumulak nga natural lang nga ang maong budget anha nila kuhaon ang sweldo sa mga tawo nga maoy unang moresponde kon adunay katalagman nga mahitabo.

Gipasabot ni Tumulak nga kon magsalig lang ang kagamhanan sa dakbayan sa mga “volunteers” mahimong dugay kaayo ang pag-responde sa panahon nga adunay katalagman.

Apil sa mga nagdawatan og sweldo nga gihulagway ni Tumulak nga “honoraryom” mao ang mga sakop sa Barangay Basak-Pardo Emergency Response team nga kanhi iyang gidumala.

Si Tumulak miingon nga padad-an nila sa dakbayan og suwat ang COA aron pasabton sa mao nga isyu.