Konsehal Nadakpan Nanigarilyo

Si Konsehal Dave Tumulak sa dakbayan sa Sugbo nasakpan sa usa ka sakop sa City Environmental Sanitation Enforcement Team (CESET) nga nanigarilyo sulod sa iyang isyu nga sakyanan nga kalapasan sa ordinansa sa siyudad.

Ang team leader sa CESET nga si Consolacion Paña maoy nakasigpat nga si Tumulak, usa sa mga sinaligan ni Mayor Michael Rama, nanabako sulod sa sakyanan sa kagamhanan nga gi-parking atubangan sa City Hall legislative building.

Matud ni CESET Chief Grace Luardo nga bisan og nakaila ang iyang sakop nga si Tumulak usa ka konsehal sa dakbayan, gipakita g’yud niini nga matinud-anon sila sa pagpatuman sa balaod.

Si Luardo mipasabot nga pagpaila nila kini sa katawhan nga makiangayon lang sila nga mopatuman sa balaod, dili kay ang pangdakpon kadto ra nga mga yano nga molupyo.

Ang pangulo sa CESET miingon nga si Tumulak nakalapas sa lagda sa City Ordinance 2241 nga nagdili sa pagpanigarilyo o pagpanabako sulod sa mga sakyanan nga publiko, apil ang mga sakyanan sa kagamhanan.

Giisyuhan g’yud ni Paña og citation ticket ang konsehal human niya gipasabot nga ang iyang gihimo pagpakita lang sa patas nga pagpatuman sa balaod.

Si Konsehal Tumulak matud pa nakasabot ra usab nga siya giisyuhan og citation diin siya sigurado nga makamulta’g P2,000.

Duha ka semana ang milabay, ang drayber sa garbage truck sa Barangay Tinago giisyuhan usab sa CESET og citation ticket kay nasakpan man nga nanigarilyo samtang nagmaneho sa trak sa basura.

Dihang gihugtan sa pagpatuman sa CESET ang pagpangisyu og citation ticket sa mga drayber og garbage truck nga mihatud og basura sa Landfill sa Consolacion nga wala’y gi-segregate ang malata ug dili malata, duha ka sakop sa CESET ang gihulga.

Ang nanghulga nga drayber sa Department of Public Services (DPS) dili na ipa-renew ni Mayor Michael Rama.