Konsehal Gustong Hitsasan og Traffic Lights ang Matag Eskina

Gusto ni Konsehal Gerardo Carillo nga hitsasan g’yud og mga traffic lights ang mga eskena sa dakbayan sa Sugbo aron nga dili g’yud kinahanglan nga magbarog taliwala sa karsada ang mga traffic enforcers.

Sa ingon nga paagi, malikayan nga ang mga traffic enforcers madam-agan sa mga kusog nga magdagan nga sakyanan sama sa nahitabo ni Traffic Enforcer Maria Theresa Bascones nga namatay sa miaging semana.

Si Acting Cebu City Mayor Edgardo Labella mipapalit na hinuon og mga reflectorized vest aron ipasul-ob sa mga traffic enforcers nga mag-duty panahon sa gabii aron makita dayon sila sa mga motorista.

Apil gani nga papalitan ni Labella og mga reflectorized vest mao ang mga tigsilhig sa karsada nga mag-duty usab panahon sa gabii kay apil sila nga mamilegro nga madasmagan.

Si Carillo miingon nga daghan kaayo nga mga eskena dinhi sa dakbayan nga walay traffic lights og maoy hinungdan nga ang mga sakop sa CITOM mapugos sa pagbarog taliwala sa karsada aron mag-deriher sa mga motorista.

Matud ni Carillo nga angay g’yud nga tagdon dayon kini’ng mao nga kakuwangan sa CITOM paghitsas sa mga eskena ug mga traffic lights.

Usa ka opisyal sa CITOM hinuon nga mihangyo nga dili lang magpaila nagkanayon nga kun sila moawhag og igo nga gahin
pagpamalit og kahimanan dili man dayon aprobahan sa konseho.

Image Credit: www.hdrinc.com