Konduktor Nanglugos og Asawa

Konduktor og usa ka passenger jeepney gipadakop sa iyang asawa tungod kay matud niya gilugos siya sa iyang bana ug kanunay’ng bun-ogon kon iyang balibaran atol nga kapoy kaayo ang iyang kalawasan.

Si PO1 Mary Rose Megio sa Women Desk Section sa kapolisan sa Presinto 2 sa Mandaue City Police Office (MCPO) mihangyo nga dili lang ilhon ang konduktor nga ilang gidakop aron dili mauwawan ang mireklamo nga 35-anyos nga asawa.

Matud ni PO1 Megio nga ang bana mamugos sa pakighilawas sa ilang asawa nga supak sa kagustohan sa babaye maisip gihapon nga usa ka pagpanglugos ubos sa Republic Act 8353 kun Marital Rape Law.

Samtang ang iyang bana nagtrabaho isip konduktor sa PUJ, ang asawa nga taga Barangay Tipolo, Mandaue mitabang usab sa ilang panginabuhian pinaagi sa pagpaninda og painit. Kaadlawon na nga mauli ang asawa gikan nga naninda.

Tungod sa kalapoy na sa iyang lawas ang asawa usahay mobalibad kon mohangyo ang iyang bana nga sila maglipay-lipay, ilabi na nga himuon kini sa bana nga buntag na ug magmata na ang ilang mga anak.

Gisaysay sa asawa ngadto kang PO1 Megio nga panahon nga mobalibad na ang asawa sa tinguha sa iyang bana, moulbo dayon ang kasuko ug mosangpot kini sa pagpamun-og.

Ang wala na makaantos nga asawa midangop sa kapolisan nga nagbase sa Barangay Subangdaku og hinungdan nga gidakop ang suspek.

Giandam na sa kapolisan ang kaso nga ipasaka batok sa mao nga konduktor nga anaa karon sa bilanggoan sa Subangdaku Police Station.