Klasi Mopadayun sa Brgy. Hall sa Sapangdaku

● Mga bata mapeligro sa karaang tunghaan sa Sapangdaku Elementary School, nga sagad malunopan kun mobunok ang kusog nga uwan.

Sugod sa adlawng Myerkules, biyaan na ug dili na gamiton pa ang edipisyo tunghaan sa Sapangdaku Elementary School nga anaa mahimutang daplin sa sapa, samtang ang klase adto mopadayun sa temporaryo nga classrooms sa Barangay Hall sa maong dapit.

Ang Barangay kapitan sa Sapangdaku nga si Lorna Damalerio walay pagsupak sa kamandoan ni Mayor Michael Rama nga ang Barangay Hall maoy temporaryong ipagamit isip classrooms kay peligro alang sa mga bata nga adto magklase sa karaang tunghaan. Ang Sapangdaku Elementary School sagad malunopan kun mobunok ang kusog nga uwan kay mosuyla man ang baha gikan sa sapa.

Matud sa mayor nga iyang katungdanan ang pagsiguro sa kaluwasan sa mga bata mao nga gimando niya nga ihiklin usa sila aron dili nila masinati pag-usab ang ilang nahiaguman kaniadtong Lunes.

Ang Cebu City Council mopadeklarar nga gipaubos sa State of Calamity ang Barangay Sapangdaku aron sa tumong nga makagamit ang dakbayan sa Sugbo sa iyang Calamity Budget alang sa pag-abag sa Department of Education (DepEd) sa pagpatukod og bag-ong tunghaan sa luwas nga dapit.

Si Konsehal Dave Tumulak, head sa Local Disaster Risk-Reduction Management Council, miingon nga ang mga bata klasehan lang og tag-tunga sa adlaw, banus-banos, aron ang 559 ka tinun-an makatambong g’yud og klase sa usa ka adlaw.

Gipanglantawan nga madugay-dugay pa ang pagtukod og bag-ong tunghaan tungod kay ang DepEd wala na makapagahin og budget alang sa pagtukod og bag-ong school building sa Barangay Sapangdaku karong tuiga.

Image Credit: www.untvweb.com