Kiha Batok Kang Rama, Tinud-on

Tinud-on g’yud ni abogado Reymelio Delute ang pagpasaka og kaso ni Mayor Michael Rama kun dili niya ihurot paghatag ngadto sa mga senior citizens ang nahabiling P5,000 sa ilang cash assistance gikan sa City Hall.

Si Delute mipadala sa miagi’ng semana og suwat ngadto sa mayor ug mibahad nga mokiha kun dili ipahurot ni Mayor Rama paghatag ang nahabiling balanse sa ilang dawatonon sa siyudad karong tuiga.

Atol sa kampanya sa eleksyon kaniadtong 2013, si Rama misaad nga P12 mil na ang ihatag niya nga cash assistance sa matag senior citizens dinhi sa dakbayan.

Kini maoy rason nga ang mga konsehal sa dakbayan miaprobar sa kinatibuk-an nga P720 milyones nga girekomendar ni Rama alang sa pagpanghatag og cash assistance sa mga senior citizens.

Ang rekord sa Office of the Senior Citizens Affairs (OSCA) nagpakita nga adunay mga 58,000 ka senior citizens nga accredited sa ilang opisina ug nagpasabot nga dili gani mahurot ang mao nga kantidad nga giaprobahan sa City Council.

Sukad kaniadto’ng Enero, miabot pa lang og P7 mil ang nahatag sa City Hall ngadto sa matag senior citizens dinhi sa dakbayan ug may kulang pa nga ‘tag P5 mil.

Matud ni Delute nga maisip nga “abuse of authority” kun dugay-dugayon ni Rama ang pag-release sa mao nga kantidad bisan ug ang budget niini giaprobahan na sa konseho.

Ang Department of Social Welfare and Services (DSWS) nag-andam og duha ka payroll nga papilian ni Rama kun pila ang kantidad nga iyang ipahatag sa mga senior citizens.

Ang usa ka payroll mopahatag og ‘tag P2 mil, samtang ang laing payroll, ‘tag P3 mil. Nagpasabot kini nga dili g’yud mahatag ang kinatibuk-an nga kantidad alang sa mga senior citizens ning tuiga.

Matud ni Mayor Rama nga dili magbuot si Delute kun pila ang iyang ipahatag sa mga senior citizens.