Kawani sa Munisipyo Positibo sa Gidiling Drugas

Upat ka mga kawani sa munisipyo sa lungsod sa Moalboal ang positibo sa paggamit og ginadiling drugas atol sa gipahigayon nga surprise drug testing sa Cebu Provincial Anti-Drug Abuse Council kun (CPADAC) sa miaging adlaw.

Sumala ni Moalboal mayor Inocentes Cabaron nga ang tulo sa upat ka mga kawani namatud-an nga positibo nga tiggamit og shabu samtang ang usa positibo sa paggamit og marijuana.

Hinuon nagdumili ang mayor sa pag-ila ug pagtug-an sa mga ngalan sa nahisgutang kawani.

Ang lungsod sa Moalboal maoy usa sa mga lungsod nga misanong sa tinguha sa Kapitolyo nga mapaubos ang ilang mga kawani sa surprise drug test nga dumalahon sa CPADAC.

Gipahibawo usab ni Mayor Cabaron nga may laing tulo ka kawani sa ilang lungsod ang milighot sa gipahigayon nga drug test. Iyang gitumbok nga ang duha ka mga kawani nga mieskapo sa drug test pulos mga driver sa munisipyo samtang ang usa nadestino sa maintenance office sa lungsod.

Hinuon iyang gitataw nga ang naasoy nga mga kawani ipaubos gihapon niya sa drug test sulod ning semanaha o kaha sa sunod semana.

Dugang pa sa mayor nga sa higayon nga mapositibo gihapon sa confirmatory test ang maong mga kawani hayan matangtang sila sa ilang tagsatagsa ka trabaho.