Kawani sa Mayor Gipakalitan og Drug Test

● Hepe sa COSAP nagkanayon nga walay bisan usa sa maong mga kawani ang napositibo.

Mga 40 ka kawani nga nadistino sa opisina ni Mayor Michael Rama gipakalitan og drug test kagahapon Biyernes apan wala’y bisan usa kanila nga napositibo sa gidili nga matang sa drugas.

Matud ni Dr. Alice Utlang, pangulo sa City Office for Substance Abuse Prevention (COSAP), nga random ang pagpili nila kinsa ang gipasumiter og sample sa ihi ug maoy gihimoan og drug test.

Si Utlang miingon nga bisan og wala’y napositibo sa mao nga una’ng hut-ong sa mga kawani, apan aduna pa’y lain nga grupo sa mga kawani gikan sa Mayor’s Office nga pakalitan na usab nila og drug test apan wala motug-an kun kanus-a.

Sa laing bahin, ang 57 ka opisyal ug kawani sa Barangay Lusaran, bukid nga barangay sa dakbayan sa Sugbo, gipakalitan ‘sab og drug test kaganiadtong Biyernes apan wala gihapo’y napositibo sa paggamit og ilegal nga drugas.

Kini maoy rason nga ang COSAP mideklarar sa mga kawani sa Barangay Lusaran nga ikapito na nga barangay dinhi sa dakbayan nga drug free.

Ang ubang barangay mao ang Taptap, Talamban, Pulangbato, Buhisan, Lusaran, Agsungot ug Budlaan.