Kawani sa Brgy. Sto Niño, buot Palagputon ni Rama

Kon si Mayor Michael Rama maoy pahukmon, gusto niya nga taktakon dayon sa katungdanan kadtong sakop sa Lupong Tagapamayapa sa Barangay Santo Niño nga napositibo sa drugtest.

Matud sa mayor nga nahanaw na ang kredibilidad sa mao nga sakop sa Lupon ug dili na siya haum nga mohusay sa panagsungi sa mga lumolupyo kay siya namatud-an man nga mogamit og gidili nga matang sa drugas.

Si Rama miingon nga depende hinuon sa mga opisyal sa Barangay Santo Niño ang paghukom kon ila ba nga palagputon sa serbisyo ang nahisgotan nga sakop sa Lupon nga namatud-an nga adik.

Una nga higayon nga ang mga sakop sa City Office for Substance-Abused Prevention (COSAP) nakasakop og sakop sa Lupon nga napositibo sa paggamit og gidili nga matang sa drugas.

Duha ka garbage loaders ug ang sakop sa Lupon sa Barangay Santo Niño pareho nga napositibo sa paggamit og gidili nga matang sa drugas diha nga ang 60 ka kawani sa barangay gipakalitan og drugtest kaniadto’ng Miyerkoles.

Pagka karon miabot na og 181 ka kawani sa kabarangayan dinhi sa dakbayan ang namatud-an nga adik sa gidili nga matang sa drugas sukad nga ang pagpahigayon og drugtest gisugdan sayo nga bahin niini’ng tuiga.