Kawani sa Barangay Ipatawag Kabahin sa Dengue sa Ilang Dapit

Ang mga opisyal sa tulo ka barangay dinhi sa dakbayan sa Sugbo giimbitar nga patambongon atol sa sesyon sa mga konsehal ugma sa buntag,Miyerkoles, aron pakisayran kon unsay ilang mga programa pagsumpo sa dengue sa ilang dapit.

Si Bise Mayor Edgardo Labella nakahuna-huna nga ibalik ang naandan nga gihimo kaniadto nga ang problema sa dengue dinhi sa dakbayan kanunay nga gitutokan sa City Council aron matabangan ang barangay kon gikinahanglan.

Giuna nila ang mga opisyal sa Barangay Guadalupe, Tisa ug Talamban nga patungahon sa ilang sesyon tungod kay ang mao nga mga barangay maoy adunay labing daghan og kaso sa dengue sa miaging tuig.

Si Konsehal Lea Ouano-Japson nga maoy tsirman sa Committee on Health and Hospital Services, miingon nga tinguha ni Labella nga mapugngan ang pagkuyanap sa dengue sa mga barangay.

Ang mga tinugyanan sa City Health Department nga gipangulohaan karon ni Dr. Daisy Villa mipasabot nga ang hinungdan nga ang mao nga mga barangay daghan og kaso sa dengue tungod kay daghan man kini og mga nagpuyo.

Ang gidak-on sa Brgy. Guadalupe katumbas sa duha o tulo ka gagmay nga barangay dinhi sa dakbayan mao nga natural lang nga daghan usab kini og kaso sa dengue.

Si Durinda Macasocol, ang assistant city epidemiologist, nagkanayon nga ang angay’ng kabalak-an kon ang mga kaso sa dengue mahitabo sa managsilingan kay nagpasabot kini nga adunay mga lamok nga nagdala og virus.

Ang paagi sa City Health Department kon may matakboyan og dengue sa usa ka dapit, mao nga ila dayong bombahan og kemikal ang palibot sa balay nga gipuy-an sa biktima aron pagpatay sa lamok nga nagdala sa virus.

Matud ni Macasocol nga daku kaayo ang posibilidad nga ang lamok nga nakapatakud og virus anaa ra sa palibot, mao nga bombahan nila ang 50 metros palibot sa balay sa natakboyan og dengue.

Ang katawhan giawhag hinoon nga manglimpyo gayud sa ilang palibot ug ang mga opisyal sa barangay gilauman nga mopatuman og Dengue Awareness campaign sa ilang tagsatagsa ka mga barangay.