Kawani Nasakpan Nag Inom Sulod sa Oras sa Trabaho

Walay swerte ang walo ka kawani sa Kapitolyo kay si Gobernador Hilario Davide III g’yud maoy nakasakop kanila nga nag-inom sa usa ka imnanan bisan og oras pa nga tingtrabaho kaniadtong Biyernes sa hapon.

Matud ni Davide nga dili niya pasayloon ang mga kawani nga kaswal kay diha-diha niya kini nga ipataktak sa serbisyo, samtang ang tulo ka regular nga kawani imbestigahon pa aron patubagon sa ilang nahimo.

Gibahibalo si Davide sa iyang drayber nga adunay lima ka kawani sa Provincial Disaster Risk Reduction and Management Office (PDRRMO), usa kanila babaye, nga nag-inom sa usa ka imnanan.

Mitimbaya pa ni Davide ang lima ka kawani dihang ang gobernador misulod sa imnanan. Dunay pipila kanila nga naghuna-huna pa nga motunol og beer kang Davide.

Diha nga gipangutana kun ngano’ng sayo sila nag-inom ug ilimnong makahubog, dunay miingon nga On Leave sila sa mao nga higayon apan nagduda si Davide.

Gipasusi ni Davide sa Personnel Section sa Kapitolyo ug nahibaw-an nga namakak ang lima ka kaswal kay ang tinuod On Duty sila sa mao nga higayon.

May lain pa nga tulo ka kawani nga nadistino sa Provincial Health Office nga nasakpan usab nga nag-inom gihapon sa duol nga tindahan.

Mga regular na nga kawani ang ikaduha nga nasakpan nga nag-inom atol sa oras nga tingtrabaho.

“Ako giadto sa ilang giimnan, nagtoo sila nga mo-ipon ko kay ang usa nitagad man, abi nila moapil ko,” matud ni Davide.

Human masuta sa rekords sa Human Resource Management Office nga On Duty ang lima ka kawani hinungdan nga gipasa ni Davide sa
Committee on Discipline and Investigation (CODI) ang kaso.

Ang hepe sa PDRRMO, Baltazar Tribunalo Jr., namahayag nga hayan matangtang g’yud ang maong mga kawani sa ilang trabaho sanglit nakalapas man sila sa lagda.

“Di na kinahanglan imbestigaron, si Gov. g’yud ang nakakita,” matud ni Tribunalo.

Matud ni Davide “Tingale ila’ng hunahuna nga buotan ra kaayo ko.”