Kawani Nangilkil og P200

Dunay kawani sa Cebu City Hall nga gipasanginlan nga nangilkil og P200 gikan sa tagdumala sa botika nga iyang gi-inspection kay nasakpan nga wala nakatuman sa tukma’ng lagda sa paghipos og basura.

Si Arante Aranas, job order employee nga nadistino sa City Community Environment and Natural Resources Office (CCENRO), gipaimbestigar mismo sa iyang hepe nga si Engr. Randy Navarro.

Kini tungod sa reklamo ni Grace Luardo, pangulo sa City Environmental Sanitation Enforcement Team (CESET), nga maoy una nga gireklamohan sa tagdumala sa botika sa IT Park.

Matud ni Navarro nga si Aranas miangkon na kaniya nga nakahimo g’yud siya og kasaypanan.

Si Mayor Michael Rama miingon nga ipataktak g’yud niya ang mao nga kawani kun nakahimo man siya og pagpangilkil sa mga balay-patigayon nga iyang gi-inspection.

Ang kawani nga si Aranas gitugyanan ni Navarro pag-inspection sa mga balay-patigayon kabahin sa Environmental Sustainability Action Plan (ESAP).

Apan matud ni Luardo nga mireklamo kanila ang tagdumala sa IT Kiosk Pharmacy kay giadto ni Aranas kaniadto’ng Abril 4 og gikataho nga gipangayoan og para “snack.”

Sa pasiuna nga imbestigasyon ni Navarro, ang iyang sakop nanghimakak sa pasangil matud pa nga sa ngadto-ngadto miangkon kini nga nakahimo g’yud og sayop.

Si Luardo miingon nga nauwaw kaayo siya kay ang tagdumala sa botika nagtoo nga sakop sa CESET ang mi-inspection kanila og nangayo’g kwarta.

“Gamay ra tuod ang gipangayo niya apan kun daghan kaayo ang iyang ma-inspection og pangayoan og bisan ‘tag P200 daku kaayo siya og natigum nga makadaut sa nagtinarong pagserbisyo,” matud ni Luardo.

Image Credit: www.myasiaglobal.com