Kaso sa HIV sa Sugbo Miabot na’g 170

Gibutyag sa kadagkoan sa Cebu City Health Department nga miabot na og 170 ka tawo dinhi sa dakbayan sa Sugbo ang natakboyan og Human Immuno-deficiency Virus (HIV) sukad kaniadtong Enero hangtud sa Marso.

Ang HIV maoy sinugdanan sa Acquired Immune Deficiency Syndrome o AIDS, ang sakit nga makamatay ug wala pa g’yuy nadiskobrehan nga tambal nga makalaalim.

Si Dr. Ilya Tac-an, hepe sa Sexually-Transmitted Diseases (STD) section, mibutyag nga sa 170 ka bag-ong nadiskubrehan nga may HIV karong tuiga, ang 84 niini giingong tiggamitan og injectible illegal drugs samtang ang uban nakuha tungod sa pakighilawas sa bayot.

Matud ni Dr. Tac-an nga halos magkapareho lang ang gidaghanon sa mga nataptan og HIV sa samang mga buwan sa milabay’ng tuig.

Hinoon, ang Philippines News Agency (PNA) mireport nga kaniadto’ng Enero hangtud sa Marso sa maging tuig, adunay 188 ka HIV dinhi sa dakbayan.

Giawhag ni Dr. Tac-an kadtong mga tawo nga nagtoo nga aduna silay sakit nga HIV sa pagpahiling dayon sa City Health Department kay libre ang mao nga examination.

Matud ni Dr. Tac-an nga aduna usab sila’y programa nga gitawag og Prevention of Mother to Child Transmission nga gisugdan pagpatuman kaniadtong 2013 diin kadtong mga nagmabdos nga may HIV atimanon g’yud dayon.

Dinhi sa dakbayan, adunay lima ka satellite laboratory nga mahimo nga adto makapahiling ang mga tawo aron mahibaw-an kun aduna ba sila’y HIV.

Kini mahimo diha sa mga health centers sa Barangay Mabolo, Pardo, Parian, Punta Prinsesa, Barangay Luz ug sa Talamban. Apan kadtong nagmabdos nga mahibaw-an nga positibo sa HIV dad-on g’yud sa ospital.