Karsada Ibalhin Alang sa Bag-ong Ospital

Ang kabahin sa karsada Panganiban dapit sa eskena Natalio Bacalso Avenue gub-on ug papason aron anha tukora ang bag-o nga Cebu City Medical Center (CCMC) building.

Mao kini ang sugyot ni Architect Miko Espina nga gikuha sa mga sakop sa CCMC Board of Directors aron mohimo’g disinyo sa pagatukoron nga bag-ong ospital.

Hinoon si Architect Espina moatubang pa sa mga sakop sa Cebu City Council atul sa ilang sesyon karong Miyerkoles aron sa pagpresentar sa iyang gisugyot nga disinyo sa building.

Kon ang mao nga building nga gidisinyo ni Architect Espina maoy dawaton sa kagamhanan sa dakbayan, mogasto kini og dul-an sa usa ka bilyon ka pesos aron kini hingpit nga mobarug.

Gitataw ni Espina nga ang iyang trabaho mao ra ang pagdisinyo sa pagatukoron nga bag-ong ospital og ang kagamhanan sa dakbayan sa Sugbo mao na ang mangita’g kontraktor nga motukod sa building.

Si Konsehal Mary Ann delos Santos, ang gitudlo nga tsirman sa CCMC Board of Directors, miingon nga nakontento siya sa disinyo sa mao nga building nga gisugyot ni Architect Espina.

Si Dra. Gloria Duterte mipasabot nga ang pagtukod sa building himoon “phase-by-phase” diin nagpasabot kini nga ang una nga proyekto mao ang pagguba sa karaang CCMC building ug ang pagbalhin sa Panganiban Street nga adto na moagi sa nahimutangan sa karaang ospital.

Ang karsada balhinon aron nga ang bag-ong CCMC anha tukora kilid gayud sa Fire Department building ug ang kabahin niini anha mookopar sa nahimutangan karon sa karsada.

Gilantaw hinoon sa uban nga madugay-dugay pa gayud nga mapatukod ang bag-ong ospital sa dakbayan sa Sugbo kay ang pagpaguba sa karaang CCMC building mogasto og daku’ng kantidad.

Ang karaang Ramos Supermarket building diha sa dalan Ramos nga duha lang ka andana og mas gamay kay sa CCMC migasto og P16 milyones sa pagpaguba.

Ang dakbayan sa Sugbo pagka karon wala pa’y igo nga pundo nga salapi nga magamit sa pagpatukod og bag-o nga ospital nga makadawat og daghang pasyente.

Kini maoy rason nga napugos kini paglusad og “peso-peso fund drive” aron makatigum og pundo nga maabag sa pagpatukod og ospital.