Karaang Taytayan Panindoton

Gusto karon ni Cebu City Vice Mayor Edgardo Labella nga panindoton ang mga taytayan dinhi sa dakbayan sa Sugbo, ilabi na kadtong natukod kaniadto pa’ng 1920.

Gawas nga panindoton ang mga tulay, gusto ni Labella nga ibalik gayud sa karaan niini nga gidak-on ang kasapaan nga nahimutangan sa mao nga mga taytayan.

Pipila sa mga tulay nga gitumbok ni Labella nga angay’ng panindoton mao ang taytayan nga nahimutang sa dalan Zulueta, dalan Sikatuna, dalan Mabini, dalan D. Jakosalem ug daghan pa nga mga tulay.

Matud sa bise mayor nga makita sa barandilya sa tulay nga anaa sa dalan Sikatuna duol sa eskena Bonifacio nga kini nahimo kaniadto pa’ng 1920.

Ang tulay sa dalan Zulueta gihulagway ni Labella nga nindot kaayo ang porma tungod kay nagporma kini og daw arko, susama sa Forbes Bridge diha sa dalan Tupaz nga laing karaan nga tulay sa dakbayan.

Si Labella miingon nga iyang pahisgotan sa mga sakop sa Cultural and Historical Affairs Commission (CHAC) kini nga isyu aron mapatuman ang iyang tinguha nga mapanindot ang mao nga tulay.

Ang sapa nga nahimutangan sa taytayan sa Sikatuna nagkagamay na ug klaro kaayo base sa barandilya sa tulay nga ang mga building ug balay tupad sa taytayan misibog sa ilang lugar ug nakapagamay sa sapa.

Matud ni Labella nga ang sapa nga milagbas sa dalan Sikatuna mao unta ang agasanan sa tubig gikan sa Barangay Day-as apan dili na kini makasapar kon dunay uwan tungod kay gamay na ang sapa hinungdan nga ang tubig mosuyla na ngadto sa karsada.

Ang mao nga dapit sa eskena Bonifacio ug Sikatuna maoy usa sa problema kaayo nga dapit sa dakbayan sa Sugbo kon mag-uwan kay kanunay kini nga lunopan ug taga tuhod.