Kapitan ug Konsehal Gikiha

Ang kapitan sa Barangay Zapatera ug usa niya ka konsehal nag-atubang karon og kiha sa Ombudsman-Visayas nga gipasaka sa usa ka barangay tanod nga gisuspenso nila og usa ka buwan.

Ang tanod nga si Eddie Mejica mipasaka og reklamo didto sa Ombudsman-Visayas batok ni Kapitan Albert “Jinggoy” Reformina ug ni Konsehal Barry Jive Burgos.

Gisuspenso si Mejica ni Kapitan Reformina bali’g usa ka buwan kaniadtong Mayo tungod kay matud pa nag-inom kini’g makahubog  nga alak atol sa iyang duty sa barangay hall.

Samtang si Konsehal Burgos mipasangil usab nga si Mejica nakalapas sa ordinansa sa dakbayan tungod kay nangihi kini sa publiko nga lugar daplin sa karsada atubangan g’yud sa barangay hall sa Zapatera.

Si Konsehal Burgos mipresentar og hulagway sa usa ka tawo nga nagkarsones apan naghukas ug T-shirt nga nagtalikud nga nangihi og nag-atubang sa koral nga sin daplin sa karsada.

Matud ni Mejica nga ang pagsuspenso kaniya ni Kapitan Reformina gipatuman nga walay affidavit sa tawo nga momatuod nga siya nag-inom og ilimnong makahubog atol sa iyang duty niadtong Abril 22.

Samtang si Mejica milantugi nga ang hulagway nga gipresentar ni Konsehal Burgos nga tawo nga nangihi sa publiko nga lugar dili siya.

Matud ni Mejica nga si Burgos nga maisip nga person in authority isip konsehal mahimo modakup sa tawo nga nangihi sa publiko nga lugar ug iyang gikwestiyon ngano nga wala kini himoa sa konsehal. Ang Ombudsman mitugyan niining maong kaso ngadto sa konseho sa dakbayan sa Sugbo.