Kapitan Mokiha, Brgy. Wala Kahatagi’g ‘Cash Assistance’

Ang kapitan sa Barangay San Roque, dakbayan sa Sugbo nga si Lediore Miranda mihulga nga mokiha batok sa mga kanhi opisyal sa barangay nga gidumala pa ni kanhi Kapitan Rogelio Ruizo.

Nasuko kaayo si Miranda kay ang Barangay San Roque wala gayud kahatagi og cash assistance gikan sa Cebu City government sa 2013 tungod sa kapakyas ni Ruizo pagsumiter og kwentada sa nahatag nga financial aid ngadto sa barangay atol nga siya pa ang kapitan.

Apan nasayran nga wala magbinugtong si Miranda kay ang hapit tanang 80 ka barangay dinhi sa dakbayan wala g’yud diay mahatagi og cash assistance nga tag P6.6 Milyones kada barangay.

Matud ni City Accountant Mark Rossel Salomon nga sa 80 ka barangay sa dakbayan, 10 lang ang nakasumiter og kwentada apan unom lang g’yud ang na-aprobahan kay ang upat kuwang og dukomento.

Nagpasabot kini nga ang Barangay San Roque usa lang sa 70 ka barangay sa dakbayan sa Sugbo nga wala pa makadawat sa cash assistance nga ihatag unta sa kabarangayan.

Ang city accountant nagkanayon nga lagda sa Commission on Audit (COA) nga unya ra sila mohatag og lain nga tabang-salapi kun makahatag na og kwentada ang barangay sa ilang paggamit sa nahauna nga cash assistance.