Kapin Upat ka Libo’ng Disgrasya sa Kadalanan Natala sa CITOM

● Sa semana sa Hunyo, adunay 83 ka aksidente sa dalan nga nalambigit sa motorsiklo.

Kapin sa upat ka libo ka aksidente sa kadalanan nahitabo dinhi lang sa dakbayan sa Sugbo gikan sa buwan sa Enero hangtod Mayo karong tuiga ug kini misangpot sa pagkamatay sa 14 ka tawo ug nakapaangol og laing 487.

Mao kini ang gireport ni Atty. Rafael Christopher Yap, ang executive officer sa Cebu City Traffic Operations Management (CITOM), nga iyang gisumiter didto sa Cebu City Council.

Nasuta base sa statistics sa CITOM nga matag buwan adunay dul-an sa usa ka libo ka aksidente nga mahitabo sa lainlaing dapit sa dakbayan.

Sa buwan sa Enero, ang CITOM nakatala og 935 ka aksidente, 874 pagka Pebrero, 845 sa Marso ug 772 ka aksidente sa Abril.

Sa buwan sa Mayo wala pa mahuman ang kwentada apan dul-an gihapon sa usa ka libo ka aksidente.

Si Joy Tumulak, ang operations chief sa CITOM, miingon nga nagkadaghan ang nahitabo nga mga aksidente sa kadalanan
tungod kay daghang drayber ang wala magmatngon sa ilang pagmaneho.

Gani matud ni Tumulak nga ang CITOM nakatala og mga 200 ka aksidente sa kadalanan dinhi sa dakbayan sulod lang sa usa ka semana atol sa pagbukas sa klase ug kadaghanan sa nalambigit sa disgrasya mao ang nagsakay ug motorsiklo.

Matud ni Tumulak nga ang Communication Section sa CITOM mibutyag nga sa una nga semana sa Hunyo, adunay 83 ka aksidente nga nalambigit sa motorsiklo.

Kini sama sa motorsiklo nga nagkabangga og awto ug PUJ, banggaanay nga pulos motorsiklo, besikleta kontra motor, taxi nga nagkabangga og motorsiklo, delivery van kontra motor ug mga tawo nga gibanggaan ogmotor.

Ang 14 nga namatay sa buwan sa Enero ngadto sa Abril, nadugangan og laing duha ka tawo sa Hunyo, ang usa niini naglambigit og aksidente sa motorsiklo.

Si Tumulak miingon nga sa una’ng semana sa Hunyo, mas daghan ug aksidente ang adlawng Biyernes, 38 ka aksidente. Gisundan sa adlawng Martes 36 ka bangga, Miyerkoles 31 ka bangga, Domingo 26 ka hitabo, Huwebes 25 ka aksidente; Sabado 25 ug adlaw’ng Lunes 19 ka bangga.

Sa unang semana sa Hunyo aduna ‘say 29 ka tawo ang nasamdan sa aksidente, apil ang usa ka biktima sa hit and run. Matud ni Tumulak nga dunay uban sa mga naaksidente sa motorsiklo nga wala magsul-ob og crash helmet.

Image Credit: Mandaue News Service