Kapin sa 200,000 OFWs Makapahimos sa Bag-ong Minimum Wage Rate sa UK

Manila (PIA)–Kapin sa 200,000 ka overseas Filipino workers (OFWs) ang makapahimos sa bag-ong nasudnong minimum wage rates sa Low Pay Commission (LPC) sa United Kingdom (UK) alang sa mga trabahante sa maong nasud nga ipahamtang sugod Oktubre 1, 2014.

Matud pa ni Department of Labor and Employment (DOLE) Kalihim Rosalinda Dimapilis-Baldoz nga base kini sa taho sa Philippine Labor Attache to the UK Joan Lavilla nga miingon nga ang bag-ong minimum wage rates mo-aplikar sa mga trabahanteng 21 anyos ug pataas; 18-20 anyos; ubos sa 18 anyos; ug sa mga apprentice.

Alang sa mga trabahanteng 21 anyos pataas, gitumbok sa taho ni Lavilla nga ang bag-ong minimum wage rate nisaka og 19 pence (P13.69), gikan sa UK pound 6.31 (P454.70) ngadto na sa UK pound 6.50 matag oras (P468.39), kun 3% nga pagsaka.

Base sa rekomendasyon sa LPC, ang bag-ong minimum wage rates alang sa mga applicable age brackets mao ang mosunod:

Alang sa 18 hangtud 20 anyos, gikan sa UK pound 5.03 (P362.46) ngadto na sa UK pound 5.13 matag oras (P369.67), kun 2% nga pagsaka;

Alang sa 16 hangtud 17 anyos, gikan sa UK pound 3.72 (P268.06) ngadto na sa UK pound 3.79 matag oras (P273.11), kun 2% nga pagsaka; ug

Alang sa mga apprentice, gikan sa UK pound 2.68 (P193.12) ngadto na sa UK pound 2.73 matag oras (P196.72), kun 2% nga pagsaka.

Kadaghanan sa mga OFW nga nagtrabaho sa UK mga nurses, radiologists, therapists, caregivers ug household service workers. (ecb/PIA7-Bohol)