Kapin 13 Mil ka Pagatpat Natanom sa DENR-7

●Ang maong kalihukan usa sa malampusong programa sa ilahang buhatan sa pagsaulog sa ‘World Environment Day’ niining bulan sa Hunyo.

Gibutyag sa Department of Environment and Natural Resources (DENR)-7 nga mikapin na sa 13 mil ka punoan sa pagatpat ang natanom nila atol sa gipahigayon nga “simultaneous mangrove planting” sa miaging adlaw sa unum ka mga coastal areas sa Central Visayas hilabi na dinhi sa lalawigan sa Sugbo.

Si DENR 7 Regional Executive Director Dr. Isabelo R. Montejo nagkanayon nga ang maong kalihukan usa sa malampuson nga programa sa ilahang buhatan sa pagsaulog niini sa world environment day niining bulan sa Hunyo.

Matud pa ni Montejo nga ang maong simultaneous mangrove planting gipahigayon didto sa Sitio Labangon, Tulic, Argao, Cabiangon, Pinamungajan, Inoburan, Naga City, Dawas Norte, Carmen pulos sa lalawigan sa Sugbo ug ingon man didto sa Calayugan Sur, Loon sa probinsiya sa Bohol ug sa Ulo, lalawigan sa Siquijor.

Kapin sa 500 ka mga tawo ang misalmot sa naasoy nga kalihukan nga gilangkuban sa mga opisyal ug mga kawani sa Local Government Unit, DENR personnel, kawani sa nagkadaiyang industriya sa lugar, mga tinun-an ug ubang mga nagpakabanang sector sa katilingban.

Gipasabot ni Montejo nga ang gipananom nga pagatpat makatabang sa pagpugong sa dagkong mga balod sa dagat ug ingon man sa storm surge sa higayon nga may dakong bagyong moabut.

“Mangroves are important as they anchor on the soil and also absorb and dissipate the energy of the waves by 70 percent thus slowing their passage in land and preventing significant damage to the coastal communities, “ sigon pa ni Montejo.