Kapin 10,000 nga Trabaho, Gitanyag sa PhilJobNet sa DOLE

May gitanyag nga 10,756 ka job vacancies alang ning semanaha sa PhilJobNet, ang internet-based job ug applicant matching portal sa Department of Labor and Employment (DOLE) diin nag-una ang industriya sa business process outsourcing (BPO) nga may daghang gitanyag nga trabaho.

Base sa datos gikan sa Bureau of Local Employment (BLE) nga maoy nag-mintinar sa centralized database sa PhilJobNet, ang mga bakanteng trabaho alang sa posisyon sa call center agent- 2,086; customer service assistant- 776; service crew- 74; staff nurse- 674; production machine operator- 602; promo salesperson- 595; real estate salesman- 570; manufacturing laborer- 515, sales clerk- 513, ug sales associate professional- 505 ka vacancies.

Ang ubang gipatik nga bakanteng trabaho naglakip sa non-formal education teacher- 449, cashier- 379, technical support staff- 377; door-to-door salesperson- 375; janitor- 310; telecommunication specialist- 297; beauty consultant- 260; salesman- 247; sugar production machine operator- 240; ug mason (general)- 240 vacancies.

Gi-awhag ni DOLE Kalihim Silvestre Bello III ang publiko sa pagpahimos sa pagbisita sa mas gipaayong serbisyo sa PhilJobNet diin gipadali niini ang pagpangita og trabaho alang sa mga nangita og trabaho. Sukad Marso 9, may kinatibuk-ang 1,535 ka accredited employers ang nipapatik og job vacancies sa PhilJobNet, samtang kinatibuk-ang 14,077 ang na-rehistrong nangita og trabaho.

Ang usa ka indibidwal nga nangita og trabaho kinahanglang dili mo-ubos sa 15 anyos nga mahimong mo-rehistro sa PhilJobNet, samtang ang bisan kinsang establisimento o employer nga duly recognized sa Philippine business authorizing agencies ug adunay Tax Identification Number (TIN), mahimong mo-rehistro isip employer.

Ang mga employers mahimong modapit og mga registered job applicants alang sa job interview sa paga-uyonang petsa ug mahimong mag-imprenta sa applicant’s profile.

Ang mga nangita og trabaho gihatagan og opsiyon kun mo-apply online ug motan-aw sa nag-unang hiring companies.

Libre ang serbisyo sa PhilJobNet alang sa aplikante ug establisimento. Alang sa uban pang job vacancies ug ubang employment facilitation services, ang mga aplikante ug employers mahimong mo- log on sa http://philjobnet.gov.ph/. (ecb/PIA7-Bohol)