Kanhi Kapitan, Gikiha

Ang kanhi kapitan sa Barangay Day-as nga gikiha na didto sa Office of the Ombudsman-Visayas kay giingong nagpadayon paggamit sa sakyanan sa barangay bisan wala na siya sa katungdanan.

Gawas ni kanhi kapitan Rey Ellery Cañada, apil nga gipasakaan og kaso mao ang numero uno nga konsehal sa Day-as nga si Marilyn Bernal, kinsa maoy giisyuhan og Toyota Hilux Plate No. SKV-439 nga iya sa City Hall.

Usa ka lumolupyo sa Barangay Day-as nga si Roberto Espina mipirma og “affidavit” nga bisan og ang sakyanan tua na giisyu kang Bernal apan padayon kining gigamit ni Cañada.

Si Engr. Dionesio Gualiza, hepe sa General Service Office (GSO), miingon nga dihang iyang gipasusi sa iyang mga sakop, nakit-an g’yud nga ang kanhi kapitan mao gihapon ang migamit sa nahisgutan’g sakyanan.

Gani ang sakyanan kanunay’ng makita nga adto mag-parking duol sa balay ni Cañada, nga dumadapig sa Team Rama. Ang bag-ong kapitan sa Day-as usa ka alyado sa Bando Osmeña Pundok-Kauswagan (BOPK).

Matud sa abogado ni Espina nga ang gihimo ni Cañada ug Bernal dakung kalapasan sa Anti-Graft and Corrupt Practices Act.

Si Cañada miingon nga giuli na unta niya ang maong sakyanan apan wala dawata sa midaug nga kapitan. Si Day-as Barangay Kapitan Jerome Puerto hinoon mipadala na og suwat ni Mayor Michael Rama aron matagad kining maong reklamo.