Kampanya Batok Sunog

Gibutyag sa Cebu City Fire Department nga ang ilang buhatan mopahigayon na og assessment sa mga barangay pinaagi sa mga pulong-pulong aron mas mapalapdan pa ang pagpangandam sa katawhan sa mahitabong sunog ning bulana ug sa sunod nga bulan.

Matud pa ni Cebu City Fire Department Fire Marshall Rogelio Bungabong nga ilang gihimo ang lakang tungod sa ilang kabalaka nga motumaw na usab ang mga sunog tungod sa gipahibawo sa PAGASA nga mabatyagan sa nasud ang mas grabi pang kainit sa panahon epekto sa El Niño Phenomenon sabulan sa Mayo ug Hunyo.

Miingon si Bungabong nga ang ilang mga fire inspector moduaw sa mga barangay sa syudad sa Sugbo ug makigtagbo sa mga barangay officials ug mga residente sa maong lugar.

Ang katuyoan niini mao nga matumbok ang mga fire hazard sa barangay ug mahibawo ang katawhan unsay angayan nga buhaton sa higayon nga moulbo ang sunog ug insaon sa paglikay niini.

Samtang gipahibawo ni Bungabong nga ila nang gipakondisyon ang ilangmga fire truck aron magamit dayon kini sa pagresponde sa sunog.

Apan iyang gitataw nga dili pa igo ang maong preparasyon kay magkinahanglan pa kini og abag sa mga barangay fire brigade ug mga katawhan mismo.

Subling gipahinumdom ni Bungabong sa mga katawhan, ilabina dinhi sa syudad sa Sugbo, nga likayan ang pagsunog sa basura duol sa ilang balay kay mao kini ang sagad hinungdan sa pagsilaub sa kayo ning panahon sa ting-init.