Kahimtang sa Taga ’93-1′ Sulbaron ni Rama

Gipasalig ni Mayor Michael Rama nga iyang paningkamotan nga masulbad ang problema sa mga lumulopyo sa yuta sa Kapitolyo nga ania mahimutang sa 11 ka barangay sa dakbayan sa Sugbo.

Ang reklamo sa mga lumulopyo sa gitawag og “93-1 lots” mao ang kamahal sa kantidad sa yuta nga buot ipabayad sa Kapitolyo kanila aron hingpit na nila nga mapanag-iya sa yuta nga ilang gipuy-an.

Gamay pa lang kaayo sa mga community associations ang nakigpirmahay og kasabotan uban sa mga opisyal sa Kapitolyo nga bayran nila ang yuta basi sa mao nga kantidad.

Ang uban sa mga nagpuyo sa yuta sa probinsya nga ania mahimutang sa dakbayan wala mopirma og kontrata tungod kay ang matag metro sa yuta nga ilang gipuy-an nagkantidag og P8,000 ngadto sa P15,000.

Matud ni Mayor Rama nga kon makalingkod na sa katungdanan si Governor-Elect Hilario Davide III andam siya nga makigsabot-sabot aron sa pagpangita’g kasulbaran sa problema sa mga urban poor.

Si Rama nagkanayon nga kauban sila kaniadto ni Davide sa Konseho sa Dakbayan sa Sugbo og sigurado siya nga maminaw kini sa mga sentimento sa katawhan nga kaniadto nahimo usab niya nga mga botante.

Basi sa rekord sa Kapitolyo, daghan pa kaayo sa mga nagpuyo sa kayutaan sa probinsya diha sa 11 ka barangay sa dakbayan ang wala pa gayud makatiwas sa pagbayad sa luna nga ilang gipuy-an.

Ang probinsya kaniadto mimugna og Provincial Ordinance 93-1 nga nagtugot nga bayran sa mga lumulopyo ang luna nga ilang gipuy-an sa data-data nga paagi apan wala kini mahimo sa ubay-ubay’ng pamilya.