Kagamhanan Lig-Ong Mohaw-as sa Kabus Gikan sa Kawad-on

Wala mausab ang baruganan sa gobyerno nga dili mohunong sa pagpaningkamot nga makab-ot ang paglambo ug mahaw-as sa kawad-on ang mga kabus nga Filipino.

Kini ang gitumbok ni Presidential spokesperson Edwin Lacierda sa usa ka press briefing sa Malacañang sa miadtong adlawng Byernis.

Gipasabot ni Lacierda nga ang tumong sa gobyerno mao ang ‘inclusive growth’ sa nasud ug mahaw-as sa kawad-on ang mga kabus. Nakatutok usab ang Philippine Development Plan sa halapad nga paglambo.

Gidugang usab ni Lacierda nga nagtakda ang administrasyon og mga lakang batok sa kakabus ug kini ipatuman agi og pagsunod sa mga gitakdang mga pamaagi.

Gibutyag ni Lacierda nga sama na lamang kun ang usa ka lalawigan nga nakahan-ay sa usa ka kategoriya, ug ipatuman sa gobyerno ang eksaktong istratehiya aron masulbad ang kakabus sa maong lugar.

Matud pa nga gitino na nila ang mga istratehiya ug pamaagi nga gisunod sa ubang nasud nga nagpatuman og susamang pagbatok sa kawad-on.

Giingong sama sa China nga sa paglabay sa daghang dekada, diin giingong gipatuman niini ang mga istratehiya batok sa kakabus sa katapusan, nasuta ang katumanan sa maong mga lakang.

Kining matang sa pagbatok sa kakabus ang gipaningkamotan usab sa gobyerno sa Pilipinas nga ipatuman sa dili pa moabot ang tuig 2016.

Bisan lisud kining tapuson sulod sa unom ka tuig, gipaabot sa gobyerno nga makuhaan ang kakabos samtang naa pa sa gahum ang administrasyong Aquino.

Image Credit: www.solarnews.ph