Kaduha ‘Mo-Enroll?

Tungod sa kaguliyang pagtudlo og presidente sa Talisay City College (TCC), hayan apektado na usab ang mga tinun-an kay posible nga makapa-enroll sila og kaduha.

Sibaw kaayo karon ang mga tabi-tabi nga ang duha ka gitudlo nga presidente sa Talisay City College magpahigayon og iya-iya nga enrollment.

Si Richel Bacaltos gitudlo sa Board of Trustees (BOT) nga presidente sa Talisay City College samtang si Paulus Mariae Cañete gitudlo usab nga presidente sa TCC pinaagi ni Mayor Johny Delos Reyes.

Si kanhi Kongresista Eduardo Gullas miingon nga kinahanglan nga tahuron g’yud unta ni Mayor Delos Reyes ang balaod.

“Religious observance of the Rule of Law equals no chaos obtaining in the prestigious Talisay City College,” matud ni Gullas.

Matud ni Gullas nga sa nahitabong kaguliyang karon sa TCC, ang mga estudyante ug mga ginikanan maoy makaluluoy tungod kay sila maoy naapektohan.

Si Gullas miingon nga anugon ang maong tunghaan nga maapektahan sa panagsungi pagtudlo og president kay upat ka higayon nga sunod-sunod kini nga naka-produce og mga estudyante nga mi-top sa teachers’ board exam.

Nakita ni Gullas nga daghang Talisaynon ang mga utokan apan dili makapadayon pag-eskwela sa kolehiyo tungod sa ka kabus hinungdan nga atol sa iyang termino gipahimo niya nga Talisay College ang karaang munisipyo sa Talisay diin barato ra ang tuition fees kun itandi sa mga pribadong unibersidad.