Opinions
Kadaugan Taliwala Sa Kapakyasan
Daghan ang mahunahunaan,
mahimong sanglitanan,
Kon hisgotan ang Kadaugan
taliwala sa Kapakyasan,
Gikan sa tubaan, hangtod
sa gahob nga tigbakayan,
Dinhi makita ang hulagway
sa kadaugan ug kapakyasan…..
Kadaugan sa hambog
ang sumsoman sa tubaan,
Kapakyasan dala sa pagkahurot
sa tinipigan ug puhunan,
Kini ang hisgotanan sa sugalan
nga kanunay’g gihugopan
Sa atong mga kamot mahimuntog,
kining tanan pilianan……
Tanan nato’ng lakang, kini
sugal nga dili katiawtiawan,
Matag tapigas ug pagkabuwasot
sa gisubay’ng agianan,
Kini usa ka kapakyasan,
mahimo’ng pait nga kasinatian
Apan kon pagpanlimbasog
hingosgan ug kadasig huptan…
Hugot nga paningkamot,
sambogan ug pagkakugihan,
Makab-ot, makuot, ug
masikop mo ang kadaugan,
Kapakyasan hinginlan,
pakisamahon’g damgo ang tanan.
Kini ang kadaugan’g gitagana
alang kanato sa kahitas-an!!!!
